Ֆրանչիսկոս Պապի Քուպայի երկրորդ օրուայ յայտագիրը` Լա Հապանա։

(Ռատիօ Վատիկան) Կիրակի` 20 սեպտեմբեր 2015-ի առաւօտեան ժամը 8-ին (Հռոմի ժամով 14-ին), Ֆրանչիսկոս Պապը Լա Հապանայի առաքելական նուիրակութենէն մեկնելով, Քահանայապետական բացօթեայ սպիտակ ինքնաշարժով, կ՛ուղղուի Լա Հապանայի ''Փլազա Տէ Լա Ռեվոլուսիոն – Խօսէ Մարթի'' հրապարակ, ուր նախատեսուած է, Ֆրանչիսկոս Պապին նախագահութեամբ հրապարակային սուրբ պատարագը։

Սուրբ Արարողութեան աւարտին, Ֆրանչիսկոս Պապը նոյն վայրէն կ՛արտասանէ Հրեշտակ Տեառն Մարեմեան աղօթքը ապա կը վերադառնայ Առաքելական Նուիրակութիւն։

Յետմիջօրէի յայտագիրը սկիզբ կ՛առնէ  տեղական ժամով 15,45-ին (Հռոմի ժամով 21,45), Ֆրանչիսկոս Սրբազան Քահանայապետին Քուպայի նախագահին պաշտօնական այցելութեամբ։

Նորին Սրբութիւնը Նախագահական Պալատ կը ժամանէ տեղական ժամով 16-ին (Հռոմի ժամով 22-ին)  ուր Պալատին մուտքին զինք կը դիմաւորէ Քուպայի Նախագահը ու միասնաբար մուտք կը գործեն ''Փալասիօ Տէ լա Ռեվոլուսիոն'' ու կը բարձրանան առաջին յարկ` ուր տեղի կ՛ունենայ երկու Պատուիրակութիւններու ներկայացումը, առանձնական հանդիպում, Նախագահական ընտանիքի ներկայացում եւ նուէրներու փոխանակում։

Քովնտի սրահի մը մէջ միեւնոյն ատեն տեղի կ՛ունենայ դիւանագիտական հանդիպում ընդմէջ Քուպայի Փոխ նախագահին եւ Վատիկանի Պետական քարտուղարին ու անոնց ընկերացող պատուիրակութիւններուն։

Նախագահական Պալատի մէջ կայացած հանդիպումի աւարտին Սրբազան Քահանայապետը եւ Քուպայի նախագահը կ՛ողջունեն պալատին առջեւ համախմբուած բազմութիւնը եւ ընկերային հաղորդակցութեան միջոցներու ներկայացուցիչները։

Ֆրանչիսկոս Պապը հուսկ հրաժեշտ կ՛առնէ Պալատէն ուղղուելով Լա Հապանայի Անարատ Յղութիւն եւ Սան Քրիսթիպալ Տէ լա Հապանա աթոռանիստ Եկեղեցի` որուն կառուցումը սկիզբ առած է 1748-ին Յիսուսեան հայրերու ձեռնարկով։

Եկեղեցւոյ մուտքին Ֆրանչիսկոս Պապը կ՛օրհնէ այնտեղ համախմբուած հաւատացեալները հուսկ եկեղեցւոյ մէջ տեղի կ՛ունենայ ժամասացութեան արարողութիւն ու հանդիպում Քուպայի կղերական դասին անդամներուն եւ նորընծաներուն հետ­, որուն սկիզբը Սրբազան Պապին ողջոյնի խօսք կ՛ուղղէ Լա Հապանա Թեմին առաջնորդը կարդինալ Օրթեկա Ի Ալամինոն, որուն կը յաջորդէ մէկ կրօնաւորուհիի մը վկայութիւնը, սուրբ գրային ընթերցումներ եւ սրբազան Պապին պատգամը։ Կղերական դասին հետ ունեցած հանդիպումի աւարտին Ֆրանչիսկոս Սրբազան Պապը կ՛ուղղուի աթոռանիստ եկեղեցւոյ կից գտնուող Լա Հապանայի Հայր Ֆելիքս Վառելայի անուան մշակութային կեդրոնը ուր տեղական ժամով 18,30-ին (Հռոմի ժամով 00,30-ին) հանդիպում կ՛ունենայ երիտասարդներուն հետ, անոնց ուղղելով ճառ մը։

Հանդիպումի աւարտին Սրբազան Պապը կը վերադառնայ առաքելական նուիրակութիւն։